001124﹣獎門人唔再噴奶 麥家琪 壽司 食到嘔

yukina 07-08-2013

Source:星島日報
冇咗噴奶環節後,曾志偉嘅《獎門人》繼續玩虐待,所以一眾參加玩遊戲的藝員都異口同聲話:「都預咗冇好結果。」前晚錄影《宇宙無敵獎門人》有柯受良、元彪、謝天華、翁虹和麥家琪等,小黑(柯受良)畀人玩到爆粗、而麥家琪就食Washbi壽司辣到嘔,翁虹就因為扮李小龍時被元彪抱起搞到胸口受創。
柯受良係一個玩得之人,所以玩遊戲時非常投入,不過佢嘅壞習慣就是情不自禁講粗口,而且他又自爆暗戀林青霞,不過佢最後都樂極生悲,食正最辣嘅Washbi壽司,搞到標眼淚。麥家琪就仲慘,畀壽司辣到嘔,即時衝咗入女廁,大班女記者跟住入去影相,男攝記就喺廁所門口眼望望。
翁虹除咗食壽司辣到標眼淚之外,扮李小龍時就因為元彪抱起她時用力過度,被元彪的頭撞正胸部,痛楚難當之下在鏡頭前搓胸,真係慘情,至於謝天華,就無驚無險滿載而歸,真係好運。
曾志 偉話,請得小黑做嘉賓,就預咗佢講粗口,不過可以剪片刪咗佢,唔會畀人投訴的。佢仲話:「遊戲已經收歛晒,核突嘢盡量減少,總之大家開心。」
文:奇利 圖:羅安強