020925﹣自爆被嘲「胸如平地 大吉大利」 學而遭志偉唱「霆鋒歌」玩殘 (星島日報)

yukina 10-08-2013

Source: 星島日報
趙學而及謝霆鋒的戀情雖已是多年前的事,但近日霆鋒為頂包案奔波,搞到舊女友學而都受牽連!前晚學而錄影《吾係獎門人》時,多次被志偉拿她和霆鋒開玩笑,學而又在節目中慘被射水,今次她真係身心都被玩到盡! 文、圖:蔡穎怡
前晚趙學而、謝天華、伍詠薇、黃佩霞、吳毅將及鄭敬基為《吾係獎門人》作嘉賓。學而甫出場即被志偉問:「近排有人為啲事好忙,你點睇?」學而深知所指是霆鋒,即以拉拉鏈狀以示封嘴。不過志偉當然不放過她,還笑稱她作謝學兒,在《吾係衰多口》的環節中,學而兩度玩輸,不但被水槍射濕全身,更慘被志偉、林曉峰及錢嘉樂即場改篇謝霆鋒的《末世紀的呼聲》「唱」她:「也許衰開有條路,擠逼的懷抱……」志偉並趁機道:「原來你濕身都咁靚,終於知點解謝霆鋒會鍾意你!」
另外,學而在節目中亦自嘲自己平胸,在說笑話的環節時,自爆有年往親屬拜年,慘被幾個小朋友恭賀道:「胸如平地,大吉大利!」難怪錢嘉樂亦趁此笑她是彭丹的對頭人!
事後,問到學而會否介意以霆鋒的歌來「潤」她時,她說:「這首歌我們經常都唱,玩起上嚟都幾啱用㗎!」雖然學而知道志偉出名多口,但亦有少少微言。「其實有啲說話應該講,有啲唔應該講。不過我上得嚟呢個節目就預咗!」
另外,對於《吾》在上星期六中秋節,收視慘跌至14點,志偉認為十分正常:「中秋節個個都出去玩,預咗啦!(是否嘉賓的卡士太弱所致?)唔關事,個Show都係照咁開。我嗰日都返咗大陸做Show啦!」