170414 - 志偉年年生日都醉 曾國祥:佢會留前鬥後

yukina 15-04-2017

http://hk.apple.nextmedia.com/enews/realtime/20170414/56566322
出爐金像獎最佳男配角曾志偉64歲生日,今晚喺跑馬地賽馬會嘅會所舉行生日會,呢次佢聯同同日生日61歲嘅黃杏秀一齊慶祝。志偉話生日願望係所有朋友都身體健康。
生日除咗開party與眾同樂,仲咁有心祝晒所有朋友身體健康,真係夠晒胸襟,所以今晚出席嘅朋友真係好多,包括佘詩曼、郭少芸、陳法蓉、文頌嫻、錢國偉、王祖藍、莎莎控股嘅老闆娘郭羅桂珍、梁靖琪(Toby)、湯盈盈、元彪、吳國敬、羅鈞滿、狄波拉(拉姑)同老公鬍鬚kong、何麗全、顧紀筠、周家怡、袁潔瑩、衛志豪、鍾麗淇、方力申、戚美珍、阮兆祥同女友、麥玲玲同老公、陳庭欣、謝天華、崔建邦等。
至於阿仔曾國祥,就喺8點45分左右同女友王敏奕拍住拖到,問到佢準備咗咩禮物?佢就話朝早已經同女友一齊送咗禮物:「送咩唔講喇,今朝俾咗佢喇,因為今朝一齊拜阿爺。」
志偉幾乎年年生日都會飲醉,咁曾國祥擔唔擔心志偉今年又醉住走?佢話:「飲醉就梗架啦,不過佢呢排record好好,幾次都係我早過佢冧,我覺得佢o依家有策略嘅,佢會留前鬥後。」