170627 - 44歲Tina傳有咗 大癮謝天華背住老婆快chur半支煙

yukina 27-06-2017

【獨家】44歲Tina傳有咗 大癮謝天華背住老婆快chur半支煙
http://hk.apple.nextmedia.com/enews/realtime/20170627/56878959
現年49歲謝天華,兩年前太太Tina以42歲高齡,生咗囝囝「天天」謝浩飛。其實早年有傳Tina輸卵管閉塞,用咗60萬做咗4次人工受孕,兩公婆終於如願一索得男。
生咗囝囝後,以往鍾意爛玩爛蒲爛飲嘅謝天華,終於肯修心養性變身湊仔公,就算拍完劇,都會自動波返屋企交人報到。月初,有報道指一直恨追女嘅謝氏伉儷,為達成湊個「好」字嘅心願,有指本身屬三高(高齡、高血壓、高血糖)嘅Tina,為趕及生仔尾班車,近月亦遵從醫生告誡,小心控制血壓同血糖,飲食亦專揀有營養食物,養好身體。
月初,謝天華喺廣州完成《風雲》舞台劇後,就火速返港慰妻,月中(15日)晚上約10點,《蘋果》就見到佢哋兩公婆,喺天后清風街一間甜品店食糖水,有指呢間甜品舖其實係由陳豪同無綫前監製戚其義投資。由於當晚人客唔少,店員就安排二人坐門外膠凳上。
只見本身有肉地嘅Tina,腰肢圓潤腹部微隆,坐冇耐,煙癮起嘅謝天華,就煞有介事,背住老婆點煙,然後快吸咗幾口煙,就算Tina喺後面問佢食乜,佢都只係背住佢點點頭。快chur半支煙兼整熄煙頭後,謝天華終於坐返正面,同老婆研究食乜好,到糖水嚟咗之後,二人三爬兩潑食唔夠15分鐘就鬆人。
其實,謝天華好友佘詩曼日前生日喺facebook開live,見到Tina同佢講生日快樂,阿佘口快快問謝太,係唔係唔可以亂講嘢,係咪有啲「秘密」唔講得住,暗示謝家有喜。對於生B計劃,謝天華亦不止一次直言:「我都想屋企再熱鬧啲,仔女都冇所謂,都唔想兩個小朋友相差太遠,正計劃中,睇個天安排啦!但亦要努力工作儲多啲錢。」
有心唔怕遲,囝囝有個伴固然好,不過縱使有冇陀B都好,要老婆硬食二口煙就唔係幾好,天華,索性戒煙啦!



相關新聞: 【黑歷史】城城同門師兄弟 謝天華花30年由Dancer變男優
http://hk.apple.nextmedia.com/enews/realtime/20170627/56879529
下個月就5字頭嘅謝天華,觀眾對其印象,多認識佢係「Laughing哥」或近來嘅「聶風」,但佢嘅舊史大家又知幾多?
謝天華(原名謝興華)喺1980年代加入大台,參加過藝員訓練班,後來轉咗去做舞蹈藝員,同郭富城及著名排舞師Sunny Wong屬同門,同樣係已故殿堂級排舞師梅施麗(Michelle Williams)嘅徒孫。後來謝天華離開大台,轉做舞蹈員,先後幫過林憶蓮、陳慧嫻等歌手伴舞。
到1992年,簽為許愿旗下,同陳小春及朱永棠組成「風火海」,推出過數張唱片;其後孖住鄭伊健拍攝《古惑仔》電影系列,憑其「大天二」角色備受注目。
除咗歌、影雙線發展,謝天華喺1997年曾獲歌神張學友賞識,喺著名音樂劇《雪狼湖》(粵語版)中,飾演富家子梁直。喺同一時期,謝天華重返大台,但今次係以演員身份返去,參演大台長篇劇《真情》等劇集,漸受注目。
到2006年,謝天華憑《女人唔易做》嘅角色「賤Man」推高人氣,翌年亦因佢參與大台與湖南衛視合辦嘅《舞動奇跡》(第一季)再成話題,結果佢同拍檔唐笑成功奪得該季冠軍。謝天華嗰幾年氣勢唔講得笑,到2009年,憑《學警狙擊》嘅「Laughing哥」將其事業推向高峰,其後更因角色大受歡迎,俾佢喺電影《Laughing Gor之變節》中擔正,兩年後於劇集《潛行狙擊》再演「Laughing哥」。
到2013年,謝天華約滿大台後冇續約,自己成立經理人公司「拉風工作室」,有接拍吓電影嗰啲,亦有返大台啲綜藝節目做吓嘉賓咁,但名氣的確不及「有約在身」嗰陣。近日喺音樂劇《風雲》中擔正做聶風,仲有得返大陸做巡迴,進賬不少。